रेगुलेटरी स्यान्डबक्सको प्रमुख उद्देश्य सुरक्षित र प्रमाणमा आधारित उत्तरदायी नवप्रवर्तनलाई प्रवर्द्धन गर्ने, नियामकीय बाधा फुकाउ गरी नवप्रवर्तनलाई समयानुचित बजारमा ल्याउन सहयोग गर्ने, ग्राहक हित संरक्षण सुनिश्चित गर्दै प्रमाणमा आधारित नीति नियम निर्माण गर्ने, प्रतिस्पर्धा विकास गर्ने, बैंक तथा फिनटेकबीच समन्वय विस्तार गर्ने  तथा नयाँ प्रविधिको विकास एवम् विस्तारमा सहयोग पुर्‍याउनु रहेको छ ।

यस बैंकले सञ्चालन गरेको रेगुलेटरी स्यान्डबक्स Cohort मा आधारित स्यान्डबक्स हो । Guidelines on the Regulatory Sandbox अनुसार Cohort भन्नाले कुनै विशेष नवप्रवर्तनको विषय (Innovation Theme) मा आधारित छ महिनाका लागि सञ्चालन गरिने संरचित स्यान्डबक्स चक्र (Structured Sandbox Cycle) हो । यस बैंकले आवश्यकतानुसार वर्षमा निश्चित संख्यामा Cohort का लागि आवेदन आह्वान गर्न सक्छ र आवेदन पेस गर्ने तोकिएको समयावधिमा प्राप्त आवेदनहरूको विस्तृत विश्लेषणपश्चात् स्यान्डबक्सका लागि सहभागी छनोट गरी निश्चित समयावधिका लागि स्यान्डबक्स परीक्षण गर्ने अनुमति प्रदान गर्न सक्छ ।

‘रेगुलेटरी स्यान्डबक्स’ भन्नाले प्रविधिमा आधारित फिनटेक नवप्रवर्तन (Fintech Innovation) लाई नियामकले तोकेको Parameters, Controls तथा Conditions मा वास्तविक ग्राहकसमक्ष निश्चित समयावधिका लागि परीक्षण गर्ने वातावरण हो । फिनटेक नवप्रवर्तन तीव्र रूपमा विस्तार भइरहेको परिप्रेक्ष्यमा विद्यमान नियामकीय (Regulatory) व्यवस्थामा त्यस्ता नवप्रवर्तनको नियमन तथा सुपरिवेक्षणसम्बन्धी व्यवस्था नभएको वा नियामकीय अस्पष्टता रहेको अवस्थामा फिनटेक नवप्रवर्तनलाई आवश्यक नियामकीय छुट (Regulatory Relaxations) प्रदान गरी वास्तविक ग्राहकसमक्ष परीक्षण गर्ने वातावरण रेगुलेटरी स्यान्डबक्सले सिर्जना गर्छ ।

रेगुलेटरी स्यान्डबक्स मुख्यत: दुई प्रकारका हुन्छन्: Open Window स्यान्डबक्स र Thematic/Cohort मा आधारित स्यान्डबक्स । Open Window स्यान्डबक्समा सहभागी आबद्ध गराउन कुनै निश्चित समयावधि तोकिएको हुँदैन र परीक्षणका लागि योग्य नवप्रवर्तनसहित आवेदन पेस गर्ने नवप्रवर्तकलाई नियामकले परीक्षणका लागि सहभागीको रूपमा स्वीकार गर्न सक्छ । Thematic/Cohort स्यान्डबक्समा निश्चित समयका लागि आवेदन आह्वान गरिन्छ र प्राप्त आवेदनबाट छनोट गरिएका सहभागीले तोकिएको समयसम्म स्यान्डबक्स परीक्षण गर्ने अवसर प्राप्त गर्छन् ।