नेपालस्थित फर्म, कम्पनी वा संस्थाले भारतबाहेक तेस्रो मुलुकबाट नेपालमा सेवा लिएबापत अमेरिकी डलर पाँच हजारसम्मको रकम बैंक तथा वित्तीय संस्थाबाट पठाउन सकिन्छ । अमेरिकी डलर पाँच हजारभन्दा बढी १२ हजारसम्मको रकम नेपाल सरकारको सम्बन्धित नियामक निकायको सिफारिसमा वाणिज्य बैंकबाट पठाउन सकिन्छ । अमेरिकी डलर १२,००० वा सोबराबरको अन्य परिवर्त्य विदेशी मुद्राभन्दा माथिको हकमा भुक्तानीको लागि नियामक निकायको सिफारिससहित नेपाल राष्ट्र बैंकको स्वीकृतिको आधारमा मात्र सटही सुविधा प्रदान हुने व्यवस्था छ ।

नेपालस्थित फर्म, कम्पनी वा संस्थाले भारतबाट नेपालमा सेवा लिएबापत भारतीय रुपैयाँ तीन लाखसम्मको रकम वाणिज्य बैंकबाट पठाउन सकिन्छ । भारतीय रुपैयाँ तीन लाखभन्दा बढी ३० लाखसम्मको रकम नेपाल सरकारको सम्बन्धित नियामक निकायको सिफारिससहित वाणिज्य बैंकबाटै पठाउन सकिन्छ । सोभन्दा अधिक रकमको हकमा नियामक निकायको सिफारिससहित नेपाल राष्ट्र बैंकको स्वीकृतिको आधारमा मात्र सटही सुविधा प्रदान गर्न सकिन्छ ।

तोकिएका वस्तुमा कम्तीमा ३०% मूल्य अभिवृद्धि भई निर्यात भएमा निर्यात रकमको बढीमा ५ प्रतिशतसम्म अनुदान रकम नेपाल सरकारबाट प्रदान गर्न सकिने व्यवस्था रहेको छ ।

नेपालस्थित फर्म, कम्पनी, संस्थामा कार्यरत विदेशी नागरिकले नेपालमा प्राप्त गरेको तलब, भत्ता तथा अन्य सुविधाबापतको रकममा कर कट्टीपश्चात् बाँकी हुने रकमको ७० प्रतिशतसम्म विदेशी मुद्रा आफ्नो देशमा पठाउन सक्ने व्यवस्था छ ।

परिवर्त्य विदेशी मुद्रा भुक्तानी हुने गरी भारतबाट प्रतीतपत्रमार्फत हाल १६७ वटा वस्तुहरु आयात गर्न सकिन्छ । यस सम्बन्धी विस्तृत जानकारी यस लिङ्कमा उपलब्ध छ ।

भारतबाहेकका तेस्रो मुलुकबाट हाल एक पटकमा अमेरिकी डलर ३५,००० (अमेरिकी डलर पैँतीस हजार) वा सोबराबरको परिवर्त्य विदेशी मुद्रासम्मको तथा भारतबाट भा.रु. तीन करोडसम्मको सामानको आयातबापतको भुक्तानी ड्राफ्ट/टी.टी. को माध्यमबाट गर्न सकिन्छ ।