सञ्चालनमा रहेका उद्यम, व्यवसायको लागि प्रदान भएको रु. १५ लाखसम्मका कर्जाहरू, प्राकृतिक प्रकोप वा कुनै महामारीका कारण बन्द रहे तापनि त्यस्तो घटनाअघि सञ्चालनमा रहेका र व्यवसायिक दृष्टिकोणले भविष्यमा सम्भाव्यता रहेका रु. १५ लाखसम्मका कर्जाहरू लगायतका पुनरकर्जा सम्बन्धी कार्यविधि, २०७७ मा तोकिए बमोजिमका कर्जाहरू लघु, घरेलु तथा साना उद्यम पुनरकर्जाका लागि योग्य हुन्छन् ।

यस बैंकबाट तोकिएका शर्तहरू पालना गरेका “क”, “ख”, “ग” र “घ” वर्गका इजाजतपत्रप्राप्त बैंक तथा वित्तीय संस्थाहरूले पुनरकर्जाको लागि आवेदन दिन सक्दछन् ।

ग्राहक ऋणी अनुसार पेश गरिने आवेदनमा पुनरकर्जा सम्बन्धी कार्यविधि, २०७७ मा तोकिए बमोजिम ग्राहक ऋणीको निवेदन, कम्पनीको हकमा लेखापरीक्षण गरिएको पछिल्लो तीन आर्थिक वर्षो वित्तीय विवरण लगायतका कागजात आवश्यक हुन्छ ।

एकमुष्ट पुनरकर्जाको लागि आवेदन आहृवान गर्दा पुनरकर्जा सम्बन्धी कार्यविधि, २०७७ मा तोकिए बमोजिमको ढाँचामा आवेदन तथा ग्राहक ऋणीको विवरण मात्र आवश्यक हुन्छ । अन्य कागजात राष्ट्र बैंकमा पेश गर्न आवश्यक छैन ।

एकमुष्ट पुनरकर्जाको लागि आवश्यक सम्पूर्ण कागजातसहित निवेदन पेश गर्ने तोकिएको म्याद समाप्त भएको एक महिनाभित्र नेपाल राष्ट्र बैंकले पुनरकर्जा सम्बन्धी निर्णय गर्दछ ।

एकमुष्टरूपमा प्रदान गरिने पुनरकर्जाको लागि नेपाल राष्ट्र बैंकले बैंक तथा वित्तीय संस्थाहरूबाट आवेदन आहृवान गर्दछ । उक्त आहृवानमा तोकिएको समयावधिभित्र बैंक तथा वित्तीय संस्थाहरुले ग्राहक ऋणीको विवरण सहित तोकिएको ढाँचामा आवेदन गरी एकमुष्ट प्रदान गरिने पुनरकर्जा प्राप्त गर्न सक्छन ।

बैंक तथा वित्तीय संस्थाले पुनरकर्जा प्राप्त गर्न दुइ तरीकाले आवेदन दिन सक्दछन् :
(क) नेपाल राष्ट्र बैंकबाट आहृवान भएको समयमा एकमुष्ट पुनरकर्जाको लागि आवेदन दिएर, र
(ख) ग्राहक ऋणीको विश्लेषण गरी ऋणी अनुसार आवेदन दिएर ।

नेपाल राष्ट्र बैंकबाट आहृवान गरी बैंक तथा वित्तीय संस्थालाई एकमुष्ट प्रदान हुने पुनरकर्जामा प्रति ग्राहक सीमा रु. ५ करोड हो भने ग्राहक ऋणी अनुसार उपलब्ध हुने साधारण पुनरकर्जाको प्रति ग्राहक सीमा रु. २० करोड हो ।

नेपाल राष्ट्र बैंक ऐन, २०५८ अनुसार पुनरकर्जा बढीमा एक वर्षे लागि प्रदान गरिन्छ ।

नेपाल राष्ट्र बैंकले प्रदान गर्ने पुनरकर्जामा ऋणीले तिर्नुपर्ने व्याजदर यस बैंकले समय समयमा तोके बमोजिम हुने गर्दछ । हालको व्याजदर देहाय बमोजिम रहेको छ ।